PINTADAK ETA BESTELAKOAK

Egunotan herria zikinago dago. Garbiketa zerbitzuak beti bezala ari dira herria garbitzen, baina hala ere, zikintzen doa egunero. Eta ez naiz ni izan konturatu den bakarra, pasa den hileko osoko bilkuran egin zen erreguetako bat horren ingurukoa izan baitzen.

Orain dela gutxi, Ibaigan Jauregian jokalarien aurkako pintadak egin zituzten Athleticzale batzuek, lortutako emaitzen ondoriozko haserrea ezagutarazteko. Haserrea edo poza adierazteko modua ez da pintaden bitartez egindakoa eta tokia ez da Ibaiganeko horma, San Mames baizik. Zaleek harmailetan eta zuzendaritzaren hauteskundeetan dute hitza.

Antzerako gauza bat gertatu da Derion ere, pintadez apaindu dute gure herria. Espraiak erabili dituzte aldarrikapenetarako, ekologia gaiez hain arduratuta daudela dioten horiek.
Adierazpen askatasuna beharrezkoa da baina ez dut uste horiek direnik modu eta lekurik egokienak.

Egun gutxi barru hasiko da hauteskunde-kanpaina baina batzuk egutegia hile bat aurreratuta daukatela edo honetan berriak direla dirudi, aspaldi hasi baitzuten.

Umeen pareko, goizeko ordu txikitan, ezkutuan, edonon itsasten dituzte herria zikintzen duten pegatinak eta ‘cartas’ esanez, etxeetako postontziak haien liburuxkez betetzen. Supermerkatu zein gainontzeko dendetan ere, publizitate-foiletoa hartzerakoan konturatzen gara hileko beherapenak barik hauteskunde-kanpainako orritxoa hartzen gabiltzala.


Beraz, pintadak egiten dituzten sasi-ekologistei eta pegatinadun isilpekoei ohartxo bat: hauteskunde-kanpaina eta hauteskundeak hurbil daude eta orduan egingo dira aldarrikapen eta bestelakoak. Bitartean, errespetatu dezagun gure herria eta mantendu dezagun garbi.